Yolel echwinqlal tnom te ka'b'e' kan
Aju’ qtanum te Ka’b’e Kan, in tiky’sa’n nin q’ij te tzalajb’il toj toxen xjaw teyele junje ab’q’i, aju’ tkyajen q’ij. Toju’ tzalajb’il te nin q’ij, nim xjal nchi b’ju’l txqol ktzaj toj tja na’j qajwil tky’itz xjan tx’otx’, junx tuky’e ktzaj ex nkyaj kq’on jun oyaj, tu’ntzun oksla’n kyu’n qa aju’ xjan at atzu’, nimju’ toklen txi’x te tkub’ qeju’ qtanum Kab’e Kan.
Iktzun tzaj tlajenju’ qman ex tata Leẍ aju’ tyuẍ najle toj nin kojb’il te Twi’ Witz tej tul b’ilqe.
—Iktenju’ ttzaj tyolen qtzan Nolasco weye’ qa jatu’me’ tkub’eju’ tja na’j qajwi’l tk’itz xjan tx’otx’ ataqju’ jun tz’sis nintz twe’ ex lawen. Atzuntz t-xe, attaq jun tilbilal ikye ninju’ se’n twi’ jun xjal. Se’nxixliye, atzu’n tzaj q’man weye qa aju’ tilb’ilal b’inchan tuky’e ab’j ma tuky’e tze.
—B’an, xitzun ljo’n tata tuky’e tlaj; Alkyete ax, aju’ qa matx b’et iyla’ ab’q’i, jaw kchmo’n kib’ iyla’ xjal tayeqe’. Ikywetleju’ se’nqe’ te kopradiy ja’le. Alkyetzunte chitzun qa kna’ jun ti’xti’ junxeku’, kuwetletej kna’ txqan kipumal, iktzun ttenju’ juntl q’ij b’aj kb’ochen te b’a’npe’ tilb’ilal ex ajb’enkye t-xaq paqtxaq.
—Tuky’etzun tq’ojq’ojel tambor tun… tun... tun extzun tuky’el tq’ojq’ojel toj twi’ su ti..titi’..titi’ tojxixtzun tzalajb’il xi q’inju’ titzb’ilal kub’t toj kojb’il tok tb’i ja’le te Txoljale. Xi ki’nju’ tilb’ilal kub’, tu’n kub’ kxime’n atzwetle kub’eju’ nkyajchaq tnom atzu.
Akxtaq nyolen te mamb’aj tuky’e tyuẍ. Qe kye k’wal, naq chi b’inkye akxtaq qeju’ taye’ chi yolen, tu’ntzun ik kychwinqlalju’ kyojqe’ tnom, qa akxtaq ate’ kab’e ma iyla’ xjal nchi nyolen, tla’ tu’n kyolen kye k’wal. Tu’n atju’ nimen kwitz tij wnaq.
—Atzun te ja’le tzul jun ti’xti junxeku’ chitzun mamb’aj, tu’n aju’ mamb’aj tjon la’jel. Apetzunju’ nq’umlejs qa aju’ titzb’ilal, te’ qsqix juntl prim, otaq tzul jun majtl txe tqan tz’sis. Ti’ju lu mix a’lex b’ilte se’n tu’mel jawele’.
Nq’umlejs kyu’n junjtel xjal, qa iyla’ kub’ b’aj ikju’. Txi q’i’n titzb’ilal kub’ kyu’n xjal, naqtzun aju’ ikxb’ajju’, aju’ tilb’ilal tzanjle ti’j qonikyen.
Mix a’lex b’ilte alkye tzanjsq’inte, iktzun ttenju’ junxeku’ aju’ jni b’aj tuky’e tilb’ilal.
Nyatzun o’kxju’ aju’ chi tat Leẍ. Q’umlejs qa jun nejenel te qtanum, ib’ajx tchq’on aye’ ka’yel ti’j kojb’il chi: “ktajkunkse aju’ tzus majx tuky’e tlok’ aju’ at tk’itz xjan tx’otx’.”
Yajxetl, yab’teju’ nejenel ma Wi’xen te tnom.
Ib’aj ttzaj ttxkon aye’ju’ Aj Q’ij ex xi tqane kye, ¿“tqalju’ nchi ni’q’ene’”? aye’tzun Aj Q’ij xi kma’n te: tz’eysje witzb’aj tu’n jaw ttx’emene aju’ tzus jatu’mel tokye tilb’ilal.
—Naqtzun aju’, aju’ tilb’ilal ex in onen kyi’j xjal chiju’ mamb’aj. Tuky’etzun aju’ b’aj tukye tilbilal, te’ txi’ q’in kub’ ex tla’ we’, tik’le tu’nju’ aju’ jaw sk’on aju’ tx’otx’ lu tu’n tkyaj te tnkya’chaq qtanum te Kab’e Kan.
—Iktzun ttenju’ aju’ tilb’ilal nq’anen ex in onen ki’j xjal.
Tukye tq’ojq’ojel tambor tun tun, tun tun ex tq’oq’ojel su ti…titi titi q’i’n kyunqe te copradiy, b’injs akxtaq chiyolen qeju’ kyuẍ kib’.